សៀមរាប៖ នាព្រឹកថ្ងៃទី១៤ ខែកុម្ភៈ ឆ្នាំ២០២៣ ប្រធានាធិបតីអាល្លឺម៉ង់ ហ្រ្វាំង វ៉ាល់ធ័រ ឆ្តែនម៉ៃយ័រ និងភរិយា បានអញ្ជើញមកដល់ព្រលានយន្តហោះខេត្តសៀមរាប ដើម្បីបំពេញទស្សនកិច្ចផ្លូវការរយៈពេល ៣ថ្ងៃនៅកម្ពុជា ចាប់ពីថ្ងៃទី១៤-១៦ ខែកុម្ភៈ ឆ្នាំ២០២៣។

រដ្ឋមន្ត្រីក្រសួងបរិស្ថាន លោក សាយ សំអាល់ និងអភិបាលខេត្តសៀមរាប លោក ទៀ សីហា ព្រមទាំងមន្ត្រីពាក់ព័ន្ធបានអញ្ជើញមកទទួលស្វាគមន៍ដំណើរមកដល់កម្ពុជារបស់លោកប្រធានាធិបតីអាល្លឺម៉ង់និងភរិយា។

ក្នុងដំណើរទស្សនាកិច្ចនេះដែរ ប្រធានាធិបតីអាល្លឺម៉ង់នឹងសិក្សាដោយផ្ទាល់អំពីស្ថានភាពបច្ចុប្បន្ននៃកិច្ចខិតខំប្រឹងប្រែងបោសសម្អាតមីនដែលកំពុងគាំទ្រដោយអាល្លឺម៉ង់ និងអំពីការងារជួសជុលដែលកំពុងធ្វើឡើងនៅបរិវេណប្រាសាទអង្គរវត្ត ហើយលោកក៏នឹងទៅទស្សនាទីតាំងរំលឹកវិញ្ញាណក្ខន្ធជនរងគ្រោះក្នុងរបបខ្មែរក្រហមផងដែរ។

នៅថ្ងៃទី១៦ ខែកុម្ភៈ ឆ្នាំ២០២៣ លោក Frank-Walter Steinmeier និងលោកស្រី Elke Bundenbender នឹងទៅបំពេញទស្សនកិច្ចនៅប្រទេសម៉ាឡេស៊ី បន្ទាប់ពីបំពេញទស្សនកិច្ចក្នុងប្រទេសកម្ពុជា៕